O Ponte Farruca de Laza, un faro de diversidade no rural

Laza volveu este sábado erixirse na capital galega da igualdade, da visibilidade LGTBI+ e da diversidade sexual e de xénero no rural cun festival que leva catro anos rompendo moldes dende o interior ourensán: a romaría Ponte Farruca.

Tras ter que adiar en agosto a súa edición máis ambiciosa polos lumes, este sábado volveron por fin á vila as batas, a tía Farruca, a música, os bailes e mil e unha actividades máis que son xa sinal de identidade dunha celebración que latexa coa forza dos seus organizadores, dos veciños da vila e dos asistentes de todo o país.

A xornada arrancou á mañá coa apertura da feira de artesanía e “Reverdecer”, unha actividade de repoboamento dos montes arredor de Laza cunha gran participación.

Despois as rúas de Laza enchéronse de troula e diversión coa tractorada engalanada e a sesión vermú, que culminaron con multitudinario xantar popular.

Á tarde foi o turno do obradoiro de cantos de taberna, da man do bailarín e coreógrafo Artur Puga. De seguido chegaron os xogos labregos, que deixaron algúns dos momentos máis divertidos da tarde, e os Farruca Deis, o particular “First Dates” rural, unha boa forma der romper o xeo e coñecer xente nova .

Concertos de gran nivel

Finalmente, á noite chegaron os concertos de Unto Vello, Tanxugueiras en acústico, Alana e Señora DJ, que alongou o fin de festa ata altas horas da madrugada.