Maceda concienciase sobre o dano cerebral

Dano Cerebral Galicia, a Federación que reúne as cinco asociacións desta discapacidade que hai na comunidade autónoma, leva o 28 de marzo a Maceda unha charla que ten como obxectivo informar sobre as causas, describir as secuelas, sensibilizar sobre a prevención e achegar referencias sobre os recursos de atención ao dano cerebral adquirido dispoñibles na contorna da comarca. Esta actividade conta co financiamento da Consellería de Política Social e Igualdade grazas ás persoas que marcan ‘X Solidaria’ na súa declaración da renda.

Esta sesión informativa está organizada en colaboración co Concello de Maceda, e vai ter lugar ás 11,00 horas no salón de plenos do Concello. É unha actividade aberta a todo tipo de público, dunha duración estimada de hora e media. Aínda que a asistencia é de balde, é preciso inscribirse chamando ao Concello.

O dano cerebral adquirido é unha discapacidade que teñen en Galicia máis de 35.000 persoas e que está causada na maioría dos casos por un ictus ou por un traumatismo cranioencefálico e que ten cada vez máis incidencia. Durante a sesión informativa achegaranse recomendacións para a prevención, así como nocións sobre como identificar un ictus.