Monterrei aproba o orzamento e duplica a partida de investimentos para 2026

TRES MILLÓNS

O Concello de Monterrei xa ten orzamento para 2026, cun importe total preto dos tres millóns no que destaca a partida de investimentos, que se duplica respecto deste exercicio

Pleno extraordinario celebrado no Concello de Monterrei. | Cedida

O Concello de Monterrei aprobou este mércores nun pleno extraordinario o proxecto de orzamento municipal para 2026. As contas, que ascenden a 2.975.545,43 euros, unha cifra calcada á deste exercicio, foron aprobadas co voto favorable do PP, mentres que Veciños de Monterrei e o BNG votaron en contra.

A partida máis grande volver ser a de persoal, cun 44%, se ben este ano redúcese ao non incorporar o obradoiro de emprego que se prevé solicitar. O capítulo de investimentos duplícase ata o 20%, 600.000 euros centrados en mellorar os camiños municipais, o saneamento e o abastecemento, traballos de reconstrucción e prevención trala vaga de lumes, e en reverter a tendencia decrecente do colexio de Medeiros.

O alcalde, José Luis Suárez, salientou que o Concello continúa na “senda de crecemento”, definiu o orzamento como “continuista e realista”, e presumiu da xestión “directa e 100% pública” do Servizo de Axuda no Fogar (SAF).

No pleno tamén se aprobaron dúas modificacións de crédito, e os grupos amosaron unanimidade contra o peche do xulgado de violencia sobre a muller de Verín.