A D.O. Ribeira Sacra descarta unha nova bodega en Monforte

Nun comunicado oficial, aclara que “o Concello de Monforte non ten ningunha parroquia no listado de parroquias que, aínda non sendo produtoras, si se autorizan como zonas de elaboración, de almacenaxe e de embotellado”. Ademais, lembra que “a parroquia de Piñeira, no Concello de Monforte, non se atopa no listado de parroquias produtoras”.

A iniciativa fora presentada en novembro pola asociación Prodeme, que pretendía ceder unha nave no parque empresarial de O Reboredo para que un grupo de viticultores crease unha cooperativa e puidese comercializar a súa uva. Os impulsores baseaban a súa solicitude, segundo explica o presidente da D.O. Antonio Lombardía, en que parte dos terreos do polígono están adscritos á parroquia soberina de Neiras, que si pertence á denominación de orixe.

Con todo, o Consello Regulador remitíuse ao Decreto 168/2024, publicado no Diario Oficial de Galicia, que determina que o polígono industrial de Monforte pertence integramente a este municipio, tras a resolución do deslindamento entre Monforte e Sober realizada pola Consellería de Presidencia. Ademais, subliña que “a parroquia de Piñeira -onde se sitúa o polígono industrial- no concello de Monforte de Lemos non se atopa no listado de parroquias produtoras do concello de Monforte de Lemos”.

Por tanto, conclúe que “por todo o anterior o polígono industrial de Monforte de Lemos non é susceptible de albergar unha instalación para a elaboración de viño amparado pola D.O. Ribeira Sacra”.

Na pasada colleita, máis de 300 viticultores non puideron vender a súa uva ás adegas que habitualmente lles mercaban a produción. O Consello Regulador prevé que esta situación non mellore na próxima vendima e demanda axudas para a denominada “colleita en verde” como medida paliativa ante as dificultades do sector.