A administración da decadencia

Chegamos ao remate do ano co anuncio da presentación dunha moción de censura no concello de O Irixo, presentada por populares e socialistas, que dará a alcaldía a Rosa María Dalama, concelleira do PSdeG, e ata o de agora -polo menos formalmente- viña formando parte do equipo da rexidora censurada, como concelleira de medio rural, medio ambiente, limpeza e alumeado público, grazas a outra moción de censura de Xuntos por Irixo e socialistas para derrubar a Manuel Cerdeira dous meses despois das elección de 2023. A concordia desa coalición durou o que dura un xeado ao sol do verán. Dimitido Ilago Fariñas, portavoz municipal socialista ata novembro último, que na sua despedida cargou con dureza contra a aínda alcaldesa, pasando a portavocía a propia Dalama, número dous da candidatura.

A Executiva dos socialistas ourensáns reaccionou con dureza fronte á operación política en marcha despois de admitir que non tiña nin idea da mesma, para desautorizala e amenazar con medidas disciplinarias ás suas duas concelleiras, nun ton que noutro tempo casaría cunha condena a galeras.

Non se sabe que é peor, que en realidade os mandamais do PSdeG non soubesen nada -cousa verosímil, aínda que soe ridículo- ou que o souberan e que todo sexa un paripé para non cargar co baldón de pactar co PP.

Polo coñecido, a situación política do concello -que en quince días irá con tres alcaldes en ano e medio e cinco dende 2019- non merece a mínima reflexión do secretario provincial do PSdeG, Rodríguez Villarino -tan absorbido polo ímprobo labor no Senado- e o seu equipo. Tampouco o esmorecemento progresivo de O Irixo no último século, no que perdeu o 80 por cento da poboación que invitaría a movilización de todos os activos para reverter a situación en lugar de manter ós representantes políticos afanados a administrar a decadencia.

Nada novo, por outra parte. A Luis Milia, alcalde de Carballeda de Avia dende 2001, botárono fóra do partido daquela -con 20 anos de militancia- por promover unha moción de censura contra o alcalde da época Ernesto Martínez. Foille ben no exilio socialista e tempo despois pedíronlle que volvera. Susana Vázquez, cabeza de lista do PSdeG en Porqueira en 2003 e única concelleira do seu grupo, foi alcaldesa con todos os votos do PP. Non deu lugar a que a acolleran, pois antes acomodouse para sempre nos populares, que con estas cousas non xogan. Así que, non tema a señora Dalama, que si lle vai ben, petarán á sua porta, para recibila con honores.