Autobuses urbanos

Unha máxima di: cando algo funciona con normalidade non o toques. Se a caso fai algunha reforma puntual e déixao como está. As reformas baseadas en arroutadas non funcionan e soamente traen problemas.

O intrépido e atrevido alcalde Jácome partindo dunha visión persoal e unicamente urbanita, crendo descubrir a pólvora propón remodelar completamente o servizo de autobuses para o 16 do mes que andamos. De momento, só sabemos o anuncio con pinceladas, pois carecemos de detalles. Con todo, a revolta semella importante. Non sei en que se afianza esta reforma. Jácome di que non lle fai falla ningún estudio polo que deduzo que o que temos diante é outra ocurrencia sen máis. Primeiro foi mercar uns autobuses moi mal deseñados: pasillos estreitos e pasos altos para acceder a unhas cadeiras sin ningún mullido; carencia de barras e asideiros na parte traseira e autobuses pequenos que son moi incómodos saltaríns, etc. E agora, no canto de quitar a concurso ó servizo, ven con esta reforma que xa veremos como resulta. Polo que descoñecemos se a fará por cuestións económicas ou pra escarallar todo o que funciona con certa normalidade. Todo é escuridade, dado que se o servizo hoxe é máis caro paras as arcas municipais é por seguir en precario, e non por outra cousa. Tampouco sei se os que o fixeron o novo deseño coñecen ben a xeografía desta nosa cidade. Pois o principal movemento de persoas danse nas liñas que cruzan a urbe norte sur e que van parar á Residencia, Cumial, Seixalbo e a Valenzá. Evidentemente esto non quere dicir que non sexan precisas outras liñas.

Foron moitos os avatares que pasaron naqueles primeiros anos cando estaba a empresa Viajes Marca

Mais fagamos un chisco de historia: Os autobuses urbanos de Ourense comenzaron a funcionar alá pola década dos cincuenta do século pasado. E dende o seu nacemento tiveron como obxectivo principal favorecer que as persoas dos distintos puntos da periferia ou o rural puideran vir á cidade ben a vender os produtos nas dúas prazas que había ou mercar nos comercios da urbe, ademais de favorecer a mobilidade da xente, poi xa estaba incorporado, por anexión, ó concello de Canedo. Desa maneira a liña número un era a de Seixalbo e a dúas a de Cudeiro pois eran os núcleos mais poboados e importantes desa periferia. Foron moitos os avatares que pasaron naqueles primeiros anos cando estaba a empresa Viajes Marca. Chegados os anos sesenta nunha reforma que ninguén pediu impuxéronse ós chamados Cercanías. Lembro que eran uns autobuses de cor branco. Aquela reforma significou un retroceso pois o urbanos non podía superar o chamado casco urbano. E os Cercanías non cumprían cos servizos que antes da reforma había no extrarradio. Protestas houbo e moitas. Ate que despois das primeiras eleccións municipais, sendo alcalde o Sr. López Iglesias houbo unha reunión de todos os alcaldes dos barrios do rural, concretamente en Seixalbo e a primeira petición que se mantivo foi que os Autobuses Urbanos chegaran a eses núcleos do rural. E as autoridades accederon a esa reivindicación. Dende aquela o servizo cara as distintas zonas seguiu funcionando ate o momento actual. Pois ben, todas as corporacións foron mellorando e aumentado as liñas estes de maneira continuada, pois primeiro os buses chegaron á Bemposta e logo ó Cumial e mesmo a Reboredo dándolle un servizo ás xentes desa zona pertencente ó concello de San Cibrao das Viñas. Polo que, tanto Seixalbo como ó Cumial hoxe dispoñen duns servizos que se resumen en catro liñas. A saber: a 1. e 2, que entra moi preto deste núcleo histórico e a 14 e a 33 que soben directamente ó Cumial. E posible que actualmente haxa que axustar horarios e paradas pois en certas franxas do día como pedían os condutores, dado que os actuais son moi malos de cumprir. Pero despois do sinalado, reducir servizos nalgúns casos para a periferia, eliminar case o cincuenta por cen de frecuencias semella unha barbaridade e un disparate monumental ó igual que cambiar o mapa de liñas na súa totalidade. Non sei se isto que se anuncia faise por querer dar a nota ou por un capricho de quen hoxe manda no concello. Desvalorizar todo o que había semella un erro importante que augura poucas cousas boas. E se non ó tempo.