La Región

Nun tempo no que a información viaxa á velocidade da luz e as redes sociais multiplican os contidos sen filtro, cobra máis valor ca nunca o papel do xornalismo local. En Ourense temos a sorte de contar con La Región, un medio que non só informa, senón que acompaña, vertebra e serve de referencia para quen se sente ourensán estea onde estea.

Para todos aqueles que, por motivos laborais ou persoais, viven fóra da provincia, La Región convértese nun fío directo coa terra, nunha xanela aberta á cidade e ás comarcas, nunha maneira de seguir pertencendo á comunidade, aínda que sexa a distancia. Ler as súas páxinas é sentirse de novo na casa, é compartir a vida diaria dun pobo que, malia estar disperso, segue unido polo orgullo de ser ourensán.

Sen xornalismo local non hai comunidade informada, nin sociedade cohesionada, nin identidade compartida

Para quen vivimos aquí, o valor é tamén inmenso. Nun mundo cheo de ruído, de rumores e de bulos que corren polas redes, ter un medio fiable resulta esencial. Cando hai un accidente, un incendio, un delito grave ou calquera outro suceso que esperta preocupación, a mellor maneira de confirmalo ao instante é acudir á edición dixital de La Región. Esa función de contraste inmediato é un servizo público fundamental, que achega tranquilidade e seguridade aos cidadáns.

Non podemos esquecer tampouco os suplementos, que son un escaparate da vida cultural, social e deportiva da provincia. Grazas a eles poñemos en valor eventos que doutro xeito pasarían desapercibidos e que enriquecen a nosa identidade colectiva.

Ademais, La Región non se limita a informar: organiza sorteos, impulsa iniciativas solidarias, promove proxectos sociais. É un medio que se implica, que se compromete, que non se queda na superficie. Iso tamén é xornalismo local: estar presente, colaborar, construír comunidade.

Por todo isto, hoxe máis ca nunca é preciso aplaudir e apoiar o labor de La Región. Porque sen xornalismo local non hai comunidade informada, nin sociedade cohesionada, nin identidade compartida. E en Ourense, temos a fortuna de contar cun medio que segue a cumprir esa función con rigor, proximidade e compromiso.