Vilar de Barrio celebra a XLVI Festa da Pataca

A cuadraxésima sexta edición da Festa da Pataca de Vilar de Barrio celebrarase a vindeira fin de semana, achegando á veciñanza dúas xornadas ateigadas de actividades co tubérculo como eixe central.

A praza do Toural, o Pavillón Municipal, os xardíns do Toural ou a Sala Manuel Gómez Portela son os espazos designados para acoller a ampla variedade de obradoiros, showcookings, conferencias, xogos e concertos que farán as delicias dos asistentes a unha das citas gastronómicas máis senlleiras da comarca.

A Festa da Pataca abrirá as súas portas o sábado 4 de outubro ás 12,00 horas con música tradicional e charangas, xunto cos xogos e actividades infantís para a cativada. Este ano, o pregón da festa estará a cargo de Begoña Vázquez, recoñecida como a mellor cociñeira galega de 2024 no programa “A voltas co prato”.

A xornada do sábado rematará ca “noite dos ovos fritidos con patacas e bolo preñado”

Ó longo da mañá celebraranse varios showcookings e degustacións de cociña de pataca galega, tenreira galega e mel, todo baixo o selo das Indicacións Xeográficas Protexidas (IXP), que darán paso á actividade cultural a cargo de Alba Vales, “Contos arredor de nós”.

Á tarde celebraranse tres conferencias que atenden a outros eidos do rural, coma actividade resineira e o aproveitamento da madeira de piñeiro ou á castaña, e por suposto ó cultivo da pataca na Limia.

A xornada do sábado rematará ca “noite dos ovos fritidos con patacas e bolo preñado”, coa que os asistentes poderán encher o bandullo antes do “Pataca Rock”, que contará coa actuación de “De Ninghures”.

A segunda xornada desta festa, o domingo 5 de outubro, comezará coa recepción dos produtos de outono e a mostra de patacas, que dará paso ó desfile “O rural e a pataca”, amenizado co música. Ás 12,30 horas será o acto institucional de presentación, antes do xantar popular.

Ás 19,00 horas terá lugar a entrega de premios á Pataca de Maior Peso e a Composición de produtos de outono máis orixinal.