O Día das Letras alía ao comercio cos colexios

ACTIVIDADES EN GALEGO

Os escaparates do CCA exporán fotos de alumnos baseados en versos e o Concello ofrece Catro proxeccións, unha feira do libro e espectáculos de música e baile tradicional e teatro

Jacobo Arias, á esquerda, na presentación da campaña das Letras Galegas. | J. C.

Os centros educativos de Rubiá e O Barco alíanse co comercio da vila na Semana das Letras Galegas. As actividades foron presentadas onte por unha representación dos equipos de dinamización da Lingua Galega e o presidente da asociación Centro Comercial Aberto (CCA) O Barco, Jacobo Arias. “Trátase de poñermos en valor a nosa lingua, nosa literatura e nosa identidade”, explicou o mestre Brais Moure. Este ano, reivindícase o papel das cantareiras na perpetuación da Lingua. “Adolfina, Rosa, Eva, Prudencia, Asunción e Manuela”, lembrou o profesor.

Na campaña participan os colexios Conde de Fenosa, Otero Pedrayo, Divina Pastora e Virxe do Camiño (Rubiá), xunto cos institutos Martaguisela e Lauro Olmo. Fotos dos seus alumnos, baseadas nos versos do Cancioneiro Popular Galego, serán expostas do 14 ao 31 de maio nos establecementos participantes, e os veciños poderán sumarse a campaña identificando os escaparates que conteñen cada verso.

Outra iniciativa consistirá na exposición de panderetas con versos no Paseo do Malecón.

Concello

O Concello barquense sumouse ás actividades das Letras Galegas cun ciclo de cine en galego, con proxeccións no Teatro Lauro Olmo, os días 7, 14, 21 e 29 de maio. Tamén haberá tempo para os libros, coa feira que abrirá o 17 e o 18 de maio na zona do arroio Cigüeño, no Malecón. O 17, a partires das 21,00 horas, a banda de gaitas e baile Coribantes ofrecerá unha escolma das súas pezas. O programa rematará a xornada do 23, a partir das 19,00 horas e na praia fluvial coa representación de Fantoches Baj “Castelao, un coración á intemperie”, dirixida a un público familiar.

Contenido patrocinado