O Chivite de Verín, premiado polo seu labor contra o acoso escolar

O Instituto de Educación Secundaria (IES) Xesús Taboada Chivite é o único ourensán en ser recoñecido pola consellería de Educación, Ciencia, Universidades e Formación Profesional nos primeiros premios “Tolerancia cero fronte ao acoso escolar”, nos que acadou o segundo posto na categoría de Secundaria, dotado con 4.000 euros.

A Xunta salienta así o compromiso e o traballo realizado por oito centros contra o acoso e a mellora da convivencia nas institucións educativas no curso anterior.

O Chivite desenvolve dende o 2016-2017 o Programa de convivencia institucional TEI (“Titorías Entre Iguais”), creado por Andrés Bellido e que implica a toda a comunidade educativa, co fin de mellorar a integración escolar, creando un centro inclusivo e non violento. Na práctica, os estudantes de 3º ESO convértense en titores emocionais dos de 1º ESO.

Isto deu como resultado o programa ChiviTEI, do que 20 mestres, o 37% do profesorado, formou parte activa e con implicación o pasado ano. Neste curso son 27 docentes, máis do 50% do claustro, os que participan na creación de actividades propias do centro e na súa realización mediante un proceso deseñado ao inicio de cada curso escolar.

“Creación de vínculos”

Para o director do IES, César Sánchez, non existe unha “variña máxica” para deter nin o acoso, nin a “existencia de conflitos que perturben a convivencia”.

Malia todo, considera que grazas á ferramenta que supón o ChiviTEI “simplemente con que unha alumna ou alumno saúde ou dea os bos días ao seu titorizado, xa é moito”.