A veciñanza de Verín descubrirá a "Festa dos Povos" de Chaves

Esta iniciativa da Eurocidade ten como obxectivo dar a coñecer o patrimonio, as celebracións e os recursos turísticos a un e outro lado da fronteira.

A seguinte actividade, dirixida á poboación verinense, terá lugar o 21 de agosto, e coincide co primeiro día da “Festa dos Povos em Aquae Flaviae”, unha celebración dos tempos dourados do Imperio Romano en Chaves.

O obxectivo é reconectar á poboación local co patrimonio termal e os recursos compartidos entre as dúas cidades, reforzando o sentimento de pertenza a un territorio común, para fomentar a dimensión transfronteiriza da Eurocidade.

Esta acción está destinada ao público xeral de Verín e a participación é gratuíta, pero as prazas son limitadas. O programa inclúe: transporte, seguro, visitas guiadas con guías bilingües acreditados, xantar, actividades culturais e de benestar, co fin de promocionar a cohesión transfronteiriza.

Inscricións

As inscricións son obrigatorias e realízanse online a través dun formulario nas redes sociais da Eurocidade. As persoas interesadas en participar tamén se poderán inscribir de xeito presencial na Oficina de Turismo de Verín.