Xinzo abre a convocatoria dos Premios da Cultura

A Concellería de Cultura de Xinzo de Limia vén de anunciar a convocatoria dos Premios da Cultura 2025, unha iniciativa que arrancou en 2023 e busca consolidarse como “símbolo de recoñecemento e gratitude” coas persoas, entidades e colectivos que contribúen, “co seu traballo constante e desinteresado”, ao desenvolvemento cultural do municipio.

Carlos Gómez, concelleiro de Cultura, explicou que a idea naceu para recoñecer aos motores da cultura da contorna, “que habitualmente nin son candidatas nin reciben ningún recoñecemento público”. Segundo apuntan dende o Concello, son un “acto simbólico de xustiza cultural”.

“Parécenos importante exemplarizar estas iniciativas, porque contribúen a completar a calidade de vida con actividades de todo tipo”, apunta Gómez, afondando en que “esta cultura que se fai no rural axuda a fixar poboación, a dinamizar os pobos e vilas”.

“Moitas veces é a propia xente das aldeas e non as institucións as que dinamizan o rural, e temos que decatarnos diso e apoialos”, continuou Gómez, “hai moita xente merecedora que fai moito traballo, que defenden a cultura, a lingua e a nosa identidade, e as veces nin nos decatamos”.

O grupo colaborador que conforma o xurado deste 2025 está integrado por “xente que xa recibiu este premio”, explicou o concelleiro, “é un grupo aberto e plural e moi comprometido coa cultura”: Cándido Paniagua Pousa, Xosé Calleja López, Manuela López Rodríguez, Fernando Dopico Blanco, Manuel Seoane Feijóo, Carlos Valle Rivera, Concepción Ogea Conde e Justo Gude Méndez.

Dende a Concellería de Cultura asumen a responsabilidade das propostas e das decisións adoptadas, mantendo un firme compromiso coa transparencia, coa participación cidadá e coa posta en valor do talento local.