Xinzo celebra o magosto coa asociación cultural A Pantalla

A Asociación Cultural A Pantalla celebrou como cada ano o seu magosto popular na vila de Xinzo. A Praza dos Ovos acolleu a decenas de veciños que decidiron achegarse malia a choiva e o mal tempo, pois a asociación preparou unha carpa para combatelo.

Porco ao espeto, empanada, bica, viño e castañas, foron os petiscos que prepararon dende A Pantalla para un “magosto completiño”. Tampouco faltou a música “cos da casa”, xa que Os Pataghulhos achegáronse para agasallar aos limiaos co seu ritmo. A cita era ás 19,00 horas, pero moito antes xa se podía ver ao porco dar voltas, o que abriu o apetito aos asistentes.