Música solidaria para contribuír a cambios sociais

O Concello de Barbadás aposta pola música como ferramenta educativa e impulsora dos cambios sociais a través do X Festival Solidario de Barbadás. Nesta décima edición, -que se levará a cabo o sábado día 22, a partir das 19,00 horas-, os beneficios do concerto irán destinados integramente á asociación Por Eles TEA.

“Esta é unha actividade que nos fai moita ilusión organizar. É unha combinación de música e solidariedade para contribuír a cambiar a sociedade, facela máis xusta, humana e empática”, explicou hoxe Marga Pérez, concelleira de Educación, na rolda de prensa de presentación. Como é habitual, os alumnos e profesores da Escola de Música Municipal de Barbadás serán os encargados do concerto, que terá lugar no auditorio do Conservatorio Profesional de Música de Ourense.

Alumnos e profesores da Escola de Música de Barbadás estará a cargo do concerto, no Auditorio do Conservatorio

María Losada, vicepresidenta de Por Eles TEA, puxo en valor a implicación do Concello de Barbadás, así como da Escola de Música, e invitou á poboación a sumarse á cita para gozar dunha “actuación fantástica” sobre o escenario. “Todo este tipo de eventos nos axudan a seguir desenvolvendo a nosa labor, apórtannos un gran de area moi necesario”, asegurou. Marga Pérez aproveitou a ocasión para resaltar o papel de Por Eles TEA, cuxo traballo “é fundamental” para acompañar ás persoas e familias afectadas. “Por iso dende as administracións temos que seguir sendo un apoio real e económico”, recalcou. Xosé Carlos Valcárcel, o alcalde, tamén enxalzou a función da entidade: “Atende a 40 familias que probablemente non terían doutro xeito os servizos e o apoio que lles facilitan”.

A vicedirectora do Conservatorio Profesional de Música de Ourense, Naiara Acuña, destacou a importancia deste tipo de actividades con fin “social e solidario”, así como da colaboración entre institucións. “Temos que tecer esa rede de colaboración entre uns e outros, porque a finalidade é a mesma”, apuntou.

As entradas, por valor de 5 euros, xa están á venda no punto de información do Centro Comercial Ponte Vella. Para aquelas persoas que non poidan asistir, pero queiran colaborar coa iniciativa igualmente, habilitouse a “fila cero”.