Campamentos urbanos en Ourense

Desafiando á vaga de calor e á de lumes e coa tráxica situación Gaza presente, a nosa querida Auria volveuse encher de participantes do Campamento Urbano organizado pola Asociación Xuvenil Amencer. O lema desta 38ª edición, “Unha historia con futuro”, lembrounos que ao longo de todos estes anos foron e son moitas as persoas que o fixeron e fan posible; tamén que é un proxecto que medra cada ano e que alimenta a ilusión de moitas persoas.

Do 1 ao 13 de agosto, nesta iniciativa de tempo libre educativo libre, aberta e gratuíta, que ofrece oportunidades para vivir a cidade de xeito diferente, coñecer persoas, relacionarse de ti a ti, descubrir espazos e xente, xogar, vivir novas experiencias, gozar das vacacións, visitar novos lugares, refrescarse... participaron 1.017 nenas e nenos, adolescentes, mozas e mozos.

Grazas a todas as rapazas, rapaces, mozas e mozos que vos apuntastes!

Un ano máis queremos transmitir a nosa gratitude unha vez rematado o Urbano.

Grazas a todas as rapazas, rapaces, mozas e mozos que vos apuntastes! Por vós, todo cobra sentido. Grazas ás familias por confiar en nós e por confiarnos as vosas fillas e fillos! Grazas a todas as animadoras e animadores pola vosa xenerosidade e compromiso! Grazas ao Concello de Ourense e á Deputación Provincial por seguir apostando polo Urbano! Grazas á Obra Salesiana de Ourense polo apoio e doazón desinteresadas e á Federación de Centros Xuvenís Don Bosco de Galicia por compartir ilusión e proxecto con nós! E por suposto, grazas tamén a todas as persoas particulares, aos organismos públicos e privados e ás 128 entidades (incluso desde o anonimato) por acompañarnos nesta historia. Tamén grazas aos medios de comunicación por darlle cobertura e visibilidade a esta proposta (de maneira especial a La Región).

Ourensás e ourensáns, grazas e desculpas se polo desenvolvemento deste campamento causamos algunha situación incómoda.

Volveremos con novas historias o próximo verán!

Equipo Coordinador do Campamento Urbano 2025