Fenosa e o desprezo

Desprezo é una palabra dura. O mesmo que Fenosa. Desprezo é unha palabra que ao utilizala, calquera identifica clara e nitidamente o que con ela se quere dicir. O mesmo que Fenosa.

Desprezo é o que Fenosa, unha das empresas máis fortes e importantes deste ruín país, manifesta cara aos seus clientes. Sendo os do rural, os que máis padecemos esa actitude.

Pola parte que nos toca, nunca tivemos ningunha falta de pagamento do recibo de consumo cando este chega. Pero pola outra parte, Fenosa, o cumprimento dela para cos seus pagadores, non garda a mesma reciprocidade. Eles poden saltarse as regras. As que sexan. Calquera. Mesmo as da decencia. É máis, e tal e como o subliño no encabezamento desta misiva, o desprezo é a palabra que para eles semella latexar por riba de calquera outra.

Neste momento, domingo 5 de febreiro, xa levamos máis de dous días sen subministración de electricidade. Con todo o que iso implica para unha familia. Aínda que para Fenosa, os núcleos de poboación máis pequenos, como así somos os do rural, iso non teña importancia. Nin esteamos dentro das súas prioridades. Palabras estas, dunha operadora que me atendeu ao chamar ao número de avarías e incidencias (900333999). Entón o desprezo, aí fica, clara e duramente manifestado.

Aínda que o peor de todo é que a min tamén me gustaría manifestar o mesmo desprezo cara a eles. Doutra maneira. Doutro xeito. Pero non podo. Debido ás duras consecuencias que ese feito me puidesen ocasionar. Por iso non me queda máis opción que este humilde escribir.