A Reforma laboral, outro problema para o Goberno de coalición

Coma se non chegasen as leas entre os dous socios do actual Goberno por mor das constantes manifestacións dalgúns ministros e ministras da formación violeta, que segue ao seu, coma se estivese na oposición. E aí están Rufián e outros socios da coalición de investidura que din que así non, o de sempre. E coidado: prohiben mesmo pactar con partidos que non formasen parte de bloque da investidura; non sei se rir ou chorar. Agora, por mor do conflito entre Ucraína e Rusia. De verdade, non se dan conta de que España forma parte da OTAN, a pesar que nas eleccións prometera sacarnos da mesma o sr Felipe González?

Lembran aquilo de “OTAN, de entrada non”? Ao final foi todo o contrario e aí quedamos cunhas condicións que non se cumpriron. Eran tres, e unha delas a de non incorporación á estrutura militar, pero aí estamos; o de non almacenar armas nucleares e o de sacar as bases dos ianquis... sen comentarios. Así era España naquel entón... era? Non, aínda seguimos aí metidos. Non hai máis que lembrar ao sr. Aznar e a foto do trío dos Azores, unha vergoña. Se Felipe González enganounos, Aznar fixo o mesmo e con fartura.

Fomos cómplices dunha invasión a Iraq por unhas supostas armas de destrución masiva que de antemán xa sabían que non existían. Miles de persoas, entre elas moitos nenos, perderon a vida nesa guerra que nunca tivo que existir. Por certo, George Bush e Toni Blair pediron perdón por aquela invasión e o sr. Aznar non o fixo. Aínda segue pensando que en Iraq hai armas de destrución masiva... En resumo, aquí non hai quen viva!