Salesianos, en Irlanda, Sobre e Allariz

Amigos e amigas:

O día 16 de setembro informábavos de que Salesianos tivera un feliz despegue de curso. Ó comezo do mesmo, reanudou tamén o seu Proxecto Ambiental “NaturezAula”. Co que quere ser protagonista da súa historia, sentindo, aprendendo e actuando; acollendo, vivindo e agasallando.

Do 25 de agosto ó 8 de setembro, un grupo de 28 estudantes de 1º a 3º da ESO, cunha mestra e unha monitora, participou nun programa en Dublín, que combinou aprendizaxe de inglés con visitas á natureza, á historia e á cultura irlandesas. Durante dúas semanas, os alumnos e alumnas gozaron dunha experiencia única dentro dun programa de inmersión lingüística. Ademais de mellorar o seu inglés, convivindo con familias e asistindo a clases, tiveron ocasión de descubrir a riqueza natural e cultural da chamada “Illa Esmeralda”. A semana completárona coa visita ós xardíns de Malahide, de máis de 9 hectáreas, que reúnen prantas ornamentais de todo o mundo, invernadoiros e un espazo de educación ambiental moi valorado en Irlanda.

O 13 de outubro, alumnado de Bioloxía e Xeoloxía de 4º de ESO, acompañado por tres educadores e o xeólogo Eduardo José González Clavijo, coordinador dos xeólogos no ámbito estatal, participou nun itinerario polo Concello de Sober. Pretendían achegarse a centros de interese deste concello, que permite aprender do rico patrimonio da zona. O itinerario artellábase arredor de catro paradas de interpretación, relacionadas con aspectos do medio (etnografía, patrimonio, natureza, historia…).

Moi orixinal foi a mostra educativa da contacontos Teresa Grau López, consistente nunha inmersión sensorial no bosque de ribeira do río Xábrega. Durante a xornada, Eduardo compartiu breves charlas sobre a xeoloxía da contorna. Na parroquia de Santo Estevo de Anllo. chamou a atención unha interesante disertación sobre a historia e a etnografía do lugar. Tiveron tamén a oportunidade de ver as consecuencias do lume sobre a paisaxe.

Logo de xantar, o transporte levounos ata San Xillao de Lobios, onde lles comentaron a igrexa, que formou parte dun antigo mosteiro de monxas benedictinas. Para rematar a actividade, o autocar achegounos ao miradoiro de Santiorxo, onde lles fixeron un recordatorio de moitos dos datos xeolóxicos comentados durante toda a xornada, nun enclave espectacular.

Amigos e amigas, tamén os días 20 e 21 de outubro, un grupo de 1º de Bacharelato estivo en Allariz convivindo, aprendendo e agasallando, porque queren ser protagonistas da súa historia. Salesianos segue a acoller e agasallar historias, porque quere ser protagonista da Historia.

Adolfo Requejo Rodríguez

(Ourense)