O Campus Auga convoca bolsas de prácticas remuneradas

O Campus Auga convoca bolsas para a realización de prácticas para o alumnado das titulacións deste proxecto de especialización do campus de Ourense acreditado e financiado pola Xunta de Galicia. O obxectivo desta nova iniciativa é potenciar a empregabilidade deste estudantado. A contía das bolsas será como máximo de 600 euros mensuais por persoas e financiarán a realización de prácticas académicas externas curriculares ou extracurriculares, cunha duración de entre dous e tres meses -que se poderá desenvolver entre o 1 de xuño e o 30 de setembro de 2025-.

No caso de estudantado que finaliza estudos deberá rematar as prácticas antes da presentación da solicitude de título e en todo caso antes do 31 de agosto de 2025. A dedicación será de 25 horas semanais das que, cando sexa necesario, poderán desenvolverse con carácter non presencial un máximo do 30% da dedicación semanal. O importe orzamentario máximo desta iniciativa é de 14.000 euros.

O alumnado solicitante deberá estar matriculado no curso 2024/2025 en Nutrición; Ciencia e Tecnoloxía Agroalimentaria e Ambiental; Sistemas Aéreos non Tripulados e Dirección e Planificación do Turismo Interior e de Saúde. Os graos son os de Ciencia e Tecnoloxía dos Alimentos; Enxeñería Agraria; Ciencias Ambientais; Enxeñería Aeroespacial; Administración e Dirección de Empresas; Turismo; Intelixencia Artificial; Dereito e os programas conxuntos dos graos de Administración e Dirección de Empresas-Dereito; Turismo-Xeografía e Historia e Administración e Dirección de Empresas-Enxeñaría Informática. No caso dos estudos de grao o estudantando ten que ter superados o 50% dos créditos no curso 2023/2024.