Catro horas de radio e tradición oral no Campus de Ourense

O campus de Ourense foi unha das novas sedes de Galicia e do norte de Portugal nas que este mércores se celebrou o 30 aniversario da Asociación Cultural e Pedagóxica “Ponte…nas ondas!”. Foi cun maratón de radio no que participaron oito centros de diferentes etapas educativas e nos que os grandes protagonistas foron a tradición oral, a interculturalidade e a interxeracionalidade.

Na emisión, guiada por Nuria Diéguez, participou alumnado dos CEIP Mestre Vide, Ben Cho Shey e O Castiñeiro de Laza; do CPI Virxe da Saleta de Cea; do IES As Lagoas; do CIFP Portovello; do centro de formación para adultos EPAPU e da Facultade de Educación e Traballo Social. Todo eles cantaron, recitaron, tocaron diferentes instrumentos musicais, narraron historias, entrevistaron a portadores da tradición oral... e convertéronse en transmisores da cultura inmaterial galega. Tamén actuaron Cé Orquestra Pantasma e o Mago Teto e non faltou unha conversa entre Xico Paradelo e Isaac Alonso Estravis.

Entre os membros do Campus que estiveron presentes nesta xornada de radio, Xosé Manuel Cid, profesor xubilado da Facultade de Educación e Traballo Social vinculado a este proxecto desde hai moitos anos, destacou que PNO! “está á altura de calquera movemento de renovación pedagóxica da historia”, subliñando entre os seus valores a interxeracionalidade, a interculturalidade e a aposta pola diversidade e pola relación entre Galicia e Portugal. Pola súa parte, Isabel Mociño, decana da Facultade de Educación e Traballo Social de Ourense, considera que foi “unha excelente oportunidade para seguir avanzando na renovación pedagóxica e na colaboración entre as entidades que participamos nesta iniciativa, e tamén para fomentar a reflexión crítica en momentos como os actuais”.

4o mini