Lobios serviu máis de mil racións de callos limiaos

A Baixa Limia celebrou hoxe unha xornada de gastronomía, verbena e tradición ca XXVI Festa dos Callos limiaos de Lobios e a XVI Carretada de Lobios.

A cita comenzaba ás 11,30 horas, cando abriu as súas portas a Feira de Artesanía, na que os asistentes e veciños foron facendo fame mentres escoitaron a alborada da Banda de Música de Lobios.

Entre compras e viños chegaron as 14,00 horas, e centos de veciños esperaban a apertura de portas do pavillón, que se converteu nun comedor xigante para a degustación dos callos limiaos, na que se serviron máis de mil racións.

Os que decidiron comer alí puideron desfrutar de salpicón de pescado e marisco, pinchos de xamón asado e como non, os tradicionais callos limiaos, acompañados de auga ou viño e remataron con arroz con leite. Outros preferiron coller as racións de callos para levar. Logo da sobremesa deu comezo a festa de colores e da escuma na explanada das piscinas municipais e a actuación da charanga CLK.

XVI Carretada

Logo de cambiar a roupa e limpar -ou intentalo polo menos- os restos dos polbos Holi da festa, os participantes deron comezo á XVI Carretada de Lobios, unha espectacular e divertida proba que ten como protagonista o tradicional carro galego.

Nesta proba os competidores completaron, en parellas e no menor tempo posible, un circuíto pechado tirando dun carro galego. Dividíronse en catro categorías segundo idades e o tamaño do carro: infantil e carro pequeno, xuvenil e carro mediano, e sénior e sénior plus -para os maiores de 56 anos-, que correron cos carros grandes en subcategorías mixtas e femininas.

Contaron con premios en metálico para os gañadores sénior e agasallos para os cativos.