Ribadavia abre hoxe nove días con 21 espectáculos na Mostra de Teatro

A Igrexa da Madalena acolle hoxe a inauguración da 40ª Mostra Internacional de Teatro de Ribadavia, unha edición na que se conta con espectáculos galegos, do resto do Estado e de diferentes países como Brasil, Arxentina, Francia ou Chile. Un total de 21 espectáculos, tres cursos de formación escénica, unha exposición e máis de 10 actividades paralelas converten a Ribadavia nun concentrado foro escénico de nove intensos días de artistas de primeiro nivel e traballos de alta calidade.

Con máis de 40 anos de historia, a MIT está quizais nun dos seus mellores momentos, cunha conexión forte co público e unha defensa esencial do territorio, segundo valora a organización que dirixe Roberto Pascual.

Tras a inauguración, na que participarán representantes do Concello, da Deputación, Xunta e Goberno de España, ábrese o telón con Ruadavia (Itinerante), contando con Nauta Teatro e Trópico de Grelos e a montaxe “Treboada”; continuando no Auditorio Rubén García do Castelo co espectáculo “Dique” de Nova Galega Danza, rematando coa entrega do Premio de Honra Roberto Vidal Bolaño ao mérito nas artes escénicas, que terá lugar no patio da Oficina de Turismo, e que este ano reaceu en Nova Galega Danza, unha compañía que pasou polo festival colleitando en dúas ocasións o Premio do Público.