A Eurocidade levará os verinenses a descubrir o “Natal” de Chaves

ACCIÓN GRATUÍTA

A veciñanza de Verín terá a oportunidade de descubrir o "mercadinho de Natal" da veciña Chaves da man da Eurocidade

Participantes verinenses na ponte de Trajano de Chaves, durante a última acción social. | Eurocidade Chaves-Verín

A Eurocidade Chaves-Verín AECT celebrará o vindeiro 13 de decembro, sábado, unha nova acción social dirixida á poboación verinense no marco do programa “Descubre a Eurocidade Chaves-Verín: o outro lado que tamén é noso”.

Esta nova actividade coincide coa época do Nadal, polo que os participantes poderán visitar o mercado de Nadal e as iluminacións festivas da cidade de Chaves.

O programa ten como fin reconectar á cidadanía co patrimonio termal e os recursos culturais e turísticos compartidos entre as dúas localidades, reforzando o sentimento de pertenza a un territorio común e promovendo a cohesión transfronteiriza.

A iniciativa inclúe transporte, seguro, visitas guiadas bilingües, xantar e actividades culturais e de benestar ao longo de toda a xornada.

Esta acción enmárcase no proxecto “Eurocidade Termal e da Auga”, cofinanciado pola Unión Europea a través do programa Interreg VI-A España-Portugal (POCTEP) 2021-2027.

Inscricións

A participación é de balde, se ben cómpre ter en conta que as prazas son limitadas. Os interesados poden inscribirse en liña nas redes sociais (@eurocidade.chavesverin) ou fisicamente na sede da Eurocidade en Feces de Abaixo ou na oficina de turismo de Verín.