Don Eligio Rivas, fillo predilecto de Xunqueira

Amig@, o día 25 de novembro de 2017 Eligio Rivas recolleu o I Premio "Pedra Alta", outorgado polo Padroado do Museo Etnolóxico da Limia. Felicitamos a Delfín Caseiro e ós demais membros do Padroado, porque souberon elexir o galardoado, un home "dunha calidade humana e altura intelectual indiscutibles, que tanto ten feito pola cultura de tódolos limiaos".

Hai anos que indiquei ó Goberno Municipal de Xunqueira de Ambía que sería un honor para tódolos xunqueiranos recoñecer Fillo Predilecto do Concello a Don Eligio Rivas, quen tiña sido galardoado co premio "Otero Pedrayo" en 1980 e a "Medalla Castelao" no ano 2000.

Durante os primeiros anos da miña feliz estancia en Allariz, alimentei o meu cariño a Galicia, bebendo nas augas limpas e profundas dos libros, folletos e artículos de Don Eligio; durante os trece anos dos meus servicios en Abeleda, Armariz e Xunqueira, as miñas conversas con Eligio reviviron en min a lectura dos escritos do humilde sabio.

Eligio viaxou por Galicia, España, Europa e América. Estudiou en galego, castelán, catalán, italiano, portugués, italiano, francés e inglés. Bebeu literatura, filosofía, teoloxía, historia e filoloxía. E acariñou, sempre, a terra que o viu nacer, porque, como nos lembra no seu libro "A Limia": "A raíz do toxo verde/ é moi mala de arrincar/ os amoriños primeiros,/ os amoriños primeiros,/ son moi malos de olvidar".

Amig@, polo berce de Eligio, pola súa traxectoria, polos seus escritos, polos seus amores, pola súa bondade… reiteramos ó Goberno Municipal de Xunqueira de Ambía que ten unha longa débeda con este fillo desa nobre terra, con este xigante da ciencia e da bonhomía; reiteramos que sería un honor para tódolos xunqueiranos (e para min, que o fun) recoñecelo públicamente como Fillo Predilecto do Concello. E atrévome a dicir ó Sr. alcalde e ós concellais de Xunqueira que non poden ter mellor remate (tamén para min, que tamén as impulsei) as importantes obras de restauración que se están levando a cabo no corazón da vila.

Noraboa, amigo Eligio, home sabio e xeneroso; presencia do futuro e do pretérito da nosa terra; "Pedra Alta" da Limia; pedrafita do Monte Medo; honor de Fondo de Vila; mestre integral coma Vicente de Paúl, evanxelizador actual coma os paúles da Cruz Alta en Ourense e os paúles dos Milagres en Baños de Molgas.

Gracias e noraboa ó Padroado do Museo da Limia por otorgar o I Premio "Pedra Alta" ó Doutor Don Eligio Rivas Quintas. Gracias e noraboa a Xunqueira de Ambía porque pronto (máis vale tarde que nunca) nomeará Fillo Predilecto do Concello a Don Eligio Rivas Quintas.