As obras sen rematar, a imputación de Jácome e Trump protagonizan as coplas dos Maios en Ourense

SATÍRICA

A Festa dos Maios en Ourense estivo marcada polas críticas a Jácome, protagonista das coplas polas obras paradas e a súa imputación, mentres Donald Trump apareceu como actor secundario

Os nenos do CEIP As Mercedes foron os gañadores do primeiro premio a mellor copla infantil. | Miguel Ángel

As coplas da Festa dos Maios tiveron un actor principal e un secundario claros. O gran protagonista foi Jácome, a quen lembraron as obras sen rematar e a súa imputación por prevaricación.

“Ourense si mola, rúas sen saídas coas obras paradas, haivos avenidas; haivos avenidas e a de Portugal con pedras e lama, todo está moi mal; todo está moi mal, Jácome imputado enchendo os seus petos, síntome estafado; síntome estafado polo noso alcalde, non declara ingresos, sáelle de balde”, dicía onte a copla “Ourense en obras”.

“As nosas demandas: queremos cultura, non tanta gramola deso hai fartura; deso hai fartura como do cemento, que cobre o Posío, vaia esperpento”, cantaron alumnos do CEIP As Mercedes.

O actor secundario foi Trump. “O ‘xeo’ en Estados Unidos ten o mundo frío, a ‘terra do libre’ e a xente sen poder dicir nin pío...”.

Ampla cobertura dos Maios en La Región, que este martes dará a coñecer os seus premios

Como cada ano, La Región entregouse cos Maios, ofrecendo unha cobertura especial. Desde a web retransmitiuse en directo esta celebración cun amplo dispositivo que contou con entrevistas en directo aos protagonistas e cantos de coplas.

Ademais, o xornal organizou o seu propio concurso no que valora tanto os maios como as coplas, outorgando aos gañadores cuantiosos premios. De feito, o premio especial de La Región ao mellor maio suporá mil euros en metálico para o gañador. Os encargados de valorar aos participantes foron José María Eguileta, Natalia González, Ana Méndez e Lalo Pavón, que cualificaron do 1 ao 5 distintos aspectos como a tradición, a creatividade ou a calidade. Os resultados publicaranse mañá martes en La Región.

Mentres tanto, onte coñecéronse os resultados do concurso organizado polo Concello. O maior premio conseguiuno Óscar López González, con “O anxo caído”; tras el na categoría de maio artístico situouse a asociación cultural Os Lolailos coa súa recreación da Ponte Romana e en terceiro lugar o Club Hóckey Albor.

En canto ao mellor maio enxebre, o premio foi para a asociación cultural Amigos da Pita, seguido pola asociación recreativa e cultural Andén Primeiro e a asociación cultural A Galleira.