Agradecemento pola Operación Quilo

Unha vez entregado todo o recadado na 39ª edición da Operación Quilo organizada desde a Asociación Xuvenil Amencer en colaboración coas Cáritas parroquiais, é momento de agradecer.

Grazas a todas as persoas que doastes os 7.557 kg de alimentos, os 3.800 kg de xoguetes, os 3.100 kg de roupa e os 9.484,16 euros que se destinaron á compra de alimentos. Grazas tamén ás 1.098 persoas voluntarias, mozas e mozos, persoas adultas, que botastes unha man para facer posible a recollida, clasificación e reparto de todo o recadado. A través das 17 Cáritas parroquiais e 3 entidades sociais serán entregados ás 680 familias (un total de 1.436 persoas) ás que atenden durante todo o ano.

Detrás de todos os quilos e diñeiro recadados están: o tempo de moitas persoas voluntarias (especialmente xente moza), a colaboración de moitas entidades e de representantes de diferentes organizacións e colectivos, a participación de numerosos locais comerciais e empresas da cidade, a achega de persoas anónimas, a difusión da campaña a través dos medios e redes, en especial a La Región, sobre todo, a solidariedade e o compromiso que nos levan a facer o que está nas nosas mans para axudar a quen nos necesitan.

En nome da Comisión de Solidariedade de Amencer e no das persoas destinatarias desta axuda tan importante: Grazas! Grazas por “quilaborar” para que nestes tempos difíciles para comprar no supermercado e pagar a vivenda e os recibos, en Ourense sexa Nadal para todas e todos.

“Quilaborando” vivimos miles de historias de compromiso e solidariedade.

Bo Nadal e próspero 2026!

Equipo coordinador da Operación Quilo 2025 (Ourense)