RAMÓN OTERO PEDRAYO

Naceu en Ourense en 1888 e finou en Trasalba en 1976. Foi catedrático de Xeografía e Historia e escritor, con obras como 'Arredor de si', 'O mesón dos ermos', 'O fidalgo e outras narracións', etcétera. A súa cultura era enciclopédica e brillou como intelectual, sendo membro tanto das Irmandades da Fala como da xeración 'Nós'. Dirixiu a sección de Xeografía e Historia do Seminario de Estudos Galegos.

Politicamente era conservador, sendo elixido deputado polo Partido Galeguista en 1931 e traballando na aprobación do Estatuto de Autonomía. Durante a Guerra Civil mantívose fiel á causa galeguista, polo que foi represaliado e perdeu a súa praza de profesor en Ourense (e puido perder a vida). Porén o seu afán de superación era notable e en 1950 gaña por oposición unha praza de catedrático na Universidade de Santiago de Compostela. Presidiu tamén a editorial Galaxia nos tempos escuros da Ditadura.

Era un home de oratoria vehemente, como demostra unha grabación de 1970, dun discurso seu sobre a revista 'Nós'. Disque dicía sempre que Galicia foi universal cando foi enxebremente galega. No 1988 adicouselle o Día das Letras Galegas. Paga a pena visitar a súa casa-museo de Trasalba, onde tamén se poden mercar libros.

Contenido patrocinado