“Ourense, A terra da chispa”. Non é difícil emparexar a esta frase a imaxe dun afiador ambulante que, empurrando a súa roda e facendo soar o seu chifre, convocaba aos veciños ao seu arredor para afiar coitelos, navallas, tesoiras e calquera outro instrumento que precisase ser posto a punto para cumprir a súa función. Unha imaxe icónica que, de poñerlle un nome e apelido, ben podería ser o de Juan Pérez que, a piques de cumprir os 90 anos (parabéns por adiantado!), non lle costa nada botar a vista atrás e lembrar un oficio que desempeñou durante case toda a súa vida, sumando unha manchea de vivencias que lle seguen a sacar un sorriso permanente que lle alumea a mirada. Ao seu carón, Consuelo Rodríguez, súa dona, fiel compañeira de vida, coa que da forma a súa historia.